Nú stendur yfir æsispennandi leiðangur Norðmannanna Børge Ousland og Thorleif Thorleifsson en þeir eru að reyna að sigla á lítilli skútu umhverfis heiminn og ekki auðveldustu leið. Takmarkið sem þeir hafa sett sér er að sigla norðvesturleiðina og norðausturleiðina á einu sumri. Þetta hefur að sjálfsögðu aldrei verið reynt áður og verður að teljast til meiriháttar afreka ef þeim tekst að klára ferðina. Ljóst er að þeir eru nokkuð á eftir áætlun enda eru þeir nú staddir á Chukchi hafi sem er fyrir norðan Beringsund. Þeir eiga því enn langa leið fyrir höndum, norður fyrir Kanada. Skútan sem þeir hafa valið sér fyrir ferðina er trimaran en það er skúta með þremur samtengdum skrokkum. Þeir félagar hafa lent í miklum ævintýrum á ferð sinni norður fyrir Síberíu. Fylgjast má með leiðangrinum á heimasíðu Børge Ousland.
