Fjallafélagið er nú að hefja sitt fyrsta starfsár. Markmið félagsins er að bjóða upp á vandaðar og umfram allt skemmtilegar ferðir á fjöll hér á landi og erlendis. Félagið starfar sem ferðaskipuleggjandi með leyfi frá Ferðamálastofu. Fyrst í stað verður aðaláherslan á hæstu tinda á Íslandi, Hvannadalshnúk, Hrútsfjallstinda og Þverártindsegg. Með tímanum mun starfsemin verða útvíkkuð og er m.a. stefnt á fjallgöngur erlendis, t.d. á fjöll á borð við Mt. Blanc og Kilimanjaro. Þó að félagið sé ungt þá er á bak við það mikil reynsla. Stofnandi félagsins er Haraldur Örn Ólafsson sem er með yfir 20 ára reynslu af fjallamennsku.
Haraldur Örn á að baki farsælan feril í fjallamennsku og heimskautaferðum og hefur meðal annars gengið á Mt. Everest, Norðurpólinn og Suðurpólinn. Hann hefur verið brautryðjandi í leiðsögn á Hvannadalshnúk og aðra tinda landsins í yfir fimm ár með Ferðafélagi Íslands. Einnig hefur hann leitt hópa á fjallatinda erlendis svo sem Mt. Blanc og Kilimanjaro.
