Fjallafélagið hefur gert samning við Sense, dreifingaraðila Canon neytendavara á Íslandi, sem felur í sér að Fjallafélagið mun nota Canon EOS 5D Mark II til að taka ljósmyndir í ferðum sínum. ,,Eitt af markmiðum Fjallafélagsins er að miðla hágæða myndefni til almennings frá íslenskum og erlendum fjöllum og fögnum við samstarfinu við Sense enda mun áhugafólk um útivist og fjallaferðir njóta afrakstursins,“ segir Haraldur Örn Ólafsson, stofnandi Fjallafélagsins.
Óhætt er að segja að Haraldur þekki Canon myndavélar vel en fyrsta myndavélin sem hann eignaðist var Canon AE-1. ,,Ég fékk hana að gjöf frá afa mínum, Haraldi Matthíassyni, en hann var mikill ferðafrömuður og göngugarpur. Síðan hef ég alltaf átt Canon myndavélar og fór meðal annars með Canon EOS 300 á hæsta fjall í heimi, Mount Everest.“
