Fór að gosstöðvunum á Fimmvörðuhálsi í dag. Það var ótrúleg upplifun að standa í 400 metra fjarlægð frá eldgosi og upplifa þá miklu krafta sem þarna voru að verki. Ég var í hópi frá Ferðafélagi Íslands sem fékk að fara inn í Þórsmörk til að kanna áhrif umbortanna á svæðið. Við gengum fyrst upp á Morinsheiði. Greinilegt var að hægt hafði á rennslinu í Hrunagil en meiri kraftar voru að verki í Hvannárgili. Reglulega stigu gríðarstórir gufustrókar til himins úr Hvannárgili. Gengið var yfir Heljarkamb og síðan var lagt í Bröttufönn. Það var ógnvekjandi að ganga yfir hæðina og standa andspænis gosinu. Hraunslettur þeyttust hátt í loft upp og hitinn frá gosinu var greinilegur. Hár hnjúkur hafði hlaðist upp vestan við gosstrókana. Hraunið þeyttist upp af miklum krafti og rann í rauðum straumi beint niður í Hvannárgil.
